المعلمين بعاملوهم كدا - أستاذ مدرسة سودانية

في واحدة من اجازاتي لاقيت اصحابي بتاعين المدرسة.. كنا ماشين نقعد لينا في أي حتة نتونس ونعيد ذكرياتنا الحلوة.. ماشين بالعربية في شارع المطار أنا لمحت واحد من اساتذتنا واقف في المحطة.. غالطوني قالوا لي اصلو انت زرقاء اليمامة قلت ليهم نرجع لو ما لقيناهو نمشي حتتنا.. لمن رجعنا نزلت انا كنت راكب قدام مشيت لقيته استاذنا الما بيغباني ذااااته سلمت عليه في راسه والاتنين المعاي عملوا نفس الطريقة في السلام.. الناس الكانوا واقفين في المحطة كانوا مستغربين للمنظر ده... المهم قال منتظر المواصلات يمشي بيته وأولاده حا يكونوا مقلقين عشان عنده سكري.. ركبناه قدام وقلن ليه بتصل اولادك تب يا استاذ.. في نص الطريق وقفنا جمب سوبر ماركيت كبير كده.. غمزنا لي بعض من غير ما يحس.. نزلنا ملينا الكبوت دوت دقيق وشاي وزيت وأي حاجة استهلاكية ممكن تقعد.. لمن وصلنا لقينا اولاده واقفين في الشارع مقلقين لانه اول ما ركب معانا قفل تليفونه عشان ما يزعجنا.. دخلنا معاه البيت قام قال لي أولاده: انتو قايلين ما عندي أولاد غيركم.. ديل برضو أولادي.. بعد نزلنا الحاجات ودخلناها جوة عيونه رقرقت ودموعه نزلت قمنا تاني بوسنا راسه وقلنا ليه هسي انت موش قلت نحن أولادك.. عملوا لينا شاي ولقيمات وطلعت الونسة أحسن من الحتة الكنا حا نمشي ليها... طبعا شال حالي قال ليهم الشايقي ده كان مشاغب جدا جدا.. ضحكنا وودعناه وبقينا كل مرة نزوره في البيت.. ونجيب ليه الأنسيولين لحدي بيته..

(٢)

واحد من اولاد الدفعة القدامنا طوالي كان في مستشفى في الخرطوم بزور في واحد قريبه لمح واحد من اساتذتنا بيتكلم مع ناس الحسابات وبيترجاهم.. خلاهو لمن طلع وجاء سألهم الحاصل شنو.. قالوا ليه عنده ولده عنده عملية والمبلغ المفروض يخته ناقص ومنتظر زول يجيب ليه قروش وولده مفروض يدخل بعد ساعتين لي عملية.. طلع دور تليفونات لي دفعته ودفعتنا.. بعد ساعة كان في منهم قريب خمسين واحد حاولوا انه ما يشوفهم جمعوا الفيها النصيب ودخلوا دفعوا القروش وخته الباقي في ظرف وقالوا للمحاسب ناديه اديه الظرف دة وخلي ولده يدخل العملية بعد تنتهي بنجي.. .. طبعا قعد ممحن ما عرف الدفع منه بعد العملية انتهت جوا شايلين أكياس الحلاوة ودخلوا عنده.. لمن شافهم بكى بي صوت مجروح لمن عمته وقعت.. حضنوهوا وباسوا راسه.. في اللحظة دي مرته كانت بتشوف في المنظر ده وبتبكي بي صوت عالي جدا.. طبعا اي زول في المستشفى دموعه نزلت..

ديل أساتذتنا وده إحساسنا تجاهم لي يوم الدين..

...........

أن كنت من يبجلون كل من علمهم حرفا اكيد دواخلك حيه . وستدمع اعينك كما ادمعت عيني ... الله احفظ كل من علمني وعلم فلذات كبدي حرفا وارحم من رحل عن هذه الفانيه واسعد كل معلم ومعلمه علي امتداد وطننا الحبيب.

..

قال الإمام الشافعيُّ رحمهُ الله: "لَيْسَ العِلْمُ مَا حُفِظَ، إِنَّما العِلْمُ مَا نَفَعَ"

#منقول