قصص ملهمة : الطالبة المتفوقة رهف عصام تحكي ضوابط تفوقها في الدراسة

رجعنا ليكم بي قصه من قصص المتفوقين لي وحدة خاضت تجربتكم..و نتمنى انه تستفيدو و تاخدو القصه دي كتجربه ما كطريقه قرايه❤️

النسبة المحرزة : ٩٥.٧٪

الترتيب بين اوائل الشهادة السودانية : 97 مشترك

المدرسة : كرري الحكومية (مدرسة علوية عبدالرافع الحكومية بنات سابقاً) 
المساق : علمي أحياء 

تجربة النبوغ :

‎السلام عليكم ورحمة الله تعالى و بركاته.. حابة احكي ليكم قصتي مع سنة تالت...السنة الكانت كلها توتر و تعب لكن برضو تعتبر افضل سنة في الحياة..زيي و زي اي زول كنت متحمسة لتالت شديد في البداية..اول م اجزنا من تانية بجاي خشيت كورس كيمياء و رياضيات بجاي...كنت خاتة في بالي هدف و اللي هو "اجي اولة الشهادة و اجيب 98,7 و غير كدا م عايزة" و الطموح حلو..

الحياة كانت حلوة لحد م بدت الانتكاسات و راكمت درس واحد مما ادى لاني اراكم كمية من الدروس و معروف لما الدروس تتراكم الزهج ببدا..مرت الايام و كل م القراية تتراكم مستواي في الحماس بيقل لحد م نزلنا المدرسة الوضع بقى أسوأ...كنت بشتغل كورسات بعد المدرسة و يوم الجمعة و السبت يعني شغالة الاسبوع كله..الصراحة كنت بركز في مواد الكورسات اكتر من المدرسة و دي م كانت حاجة كويسة لانه اهملت مواد على حساب الكيمياء و الرياضيات...جا الشهري الاول و ضغطت نفسي فيه شديد بس بلا فايدة جبت في التمنينات و جبت في العربي اقل درجة في الفصل "75"...و الفيزياء برضو كنت جايبة فيها كعب ف اضطريت اخش ليها كورس من نص سنة و هنا الضغطة زادت..انا كنت برجع البيت زولة نوم بس...استمر تراكم الدروس لحد م جا الشهري التاني و برضو كنت مهملة مواد المدرسة ف ضغطت نفسي في الاخر و برضو بلا فايدة جبت في التمنينات و حرفيا الفترة ديك اكتئبت..اي زول لاحظ لي و كانو مسمني المنفسنة و كنت بقضيها نوم في الحصص لانه خلاص حسيت انه ماف فايدة من قرايتي لانها م قعد تجي بنتيجة دا غير الكلام المحبط البسمعه من كم زول و م بفشل انه يدمرني...مرت الايام لحد م اضربو ناس المدرسة و هنا انا اقتنعت اني ح اخش امتحان الشهادة من غير م المقررات تتم...

غبت من المدرسة و بديت اقرا المقررات براي و اشوف المواد الم خاشة ليها كورسات دي فيها شنو زي الاحياء لاني م كنت بقرا ليها الا للشهري...الفترة ديك كنا فرمضان اللي هو اصلا بديت فيه القراية الجد..لقيت نفسي عندي مشاكل عميقة فبلاغة اولى و تانية و م فاهماها فاضطريت اخش ليها كورس برضو و نفعني الحمدلله...رمضان كان شهر جميل جدا قدرت انجز فيه مسكت اي مادة جريتها كم يوم لحد م تميتها و حليت فيها مريح و كم مذكرة و سمّعت كتاب الاسلامية و الاحياء في كراس خارجي و النظام البيئي حفظتو براي لانه كنا متاخرين في المدرسة... و لخصت كتاب الاسلامية فشكل سؤال و جواب و الحمدلله خلصت الكيمياء و الرياضيات مع ناس الكورس و فضل عندي مشكلة الفيزياء اللي هو باقي المواد كلها انجزتها فرمضان الا هي...طلعو لينا بامتحان تجريبي فالمدرسة و الصراحة نفعني شديد راجعت المواد كلها تاني و الحمدلله امتحنت بشكل جميل و جبت نسبة مقبولة..بعد انتهينا كان فضل اقل من اسبوعين و نبدا امتحانات الشهادة انا فباقي الاسبوعين ديل بديت اشوف مشاكلي فالفيزياء و لقيت اني سايطة المادة شديد و خلاص ماف امل احسن اخليها و اركز باقي المواد...

جات الامتحانات و امتحنت بشكل كعب جدا ف اغلب المواد و اي امتحان كان عندي معاه موقف غبي..شي كتبت بسملة محل اسمي و شي كتبت جواب سؤال محل سؤال تاني و شي ورقتي طارت من الشباك و والله كنت معذبة المراقبين...طلعت من اخر امتحان و انا م خاتة فبالي اني ح اتذاع اصلا..ولا امي ولا ابوي خاتين اني ح اتذاع ولا زول فينا كان متوقع بقرايتي دي اني اتذاع لكن الحمدلله الحمدلله و اعيد و اكرر كله بفضل ربنا♡