قصص ملهمة : الطالبة آمنة أحمد تحكي ضوابط تفوقها في الدراسة

الاسم : آمنة أحمد 

سنة الامتحان : ٢٠٢٢م 

أحرزت نسبة : ٩٥.٤٪؜ ✨

عاوزة احكي ليكم عن تجربتي اللطيفة جدًا مع الصف الثالث الثانوي..

قبل الصف الثالث

بدايةً ما قبل تالت، في تانية ثانوي انا ما كنت الزولة الحفّارة ديك، ولا كانت تالتة ذات أهمية بالنسبة لي .. كنت بحس انها زيها زي أي سنة ..

فاختي الكبيرة وقدوتي لاحظت لامُبالاتي بالموضوع وقعدت تتكلم معاي بخصوص تالتة وبيّنت لي قدر شنو هي سنة مهمة .. وعرفت انو فعلاً انا لازم اجتهد فيها واجيب نسبة عالية .

نسبتي ف تانية ثانوي كانت أقل من المتوقع لكن الحاجة دي أبد ما احبطتني لا كمان شجعتني وحمستني اكتر .. حسيت انو لا لا يا آمنة دا ما مستواك، انتِ بتقدري تجيبي أعلى من كدا ..

تحديد الهدف

حددت هدفي قبل ننزل تالتة انو لازم اجيب نسبة عالية لأسباب كتيرة، وأهمّها : افرّح اهلي التعبانين عشاني عمرهم كلو .. ما كتير عليهم انو اتعب عشانهم سنة واحدة بس .

الشغف للدراسة

بدت الدراسة ونزلت بكل شغف وحماس وانو انا لازم اجيب نسبة عالية ..

حب المجال

اي زول يسألني عايزة تتخصصي شنو ف الجامعة؟ بقول ليه ما عارفة بس عاوزة اجيب نسبة تخليني اخت رجل على رجل واقدّم .. عاوزة نسبة تخليني ادخل أي كلية فـ أي جامعة انا عاوزاها .. عاوزة نسبة تخليني اختار الجامعة مش نسبة تخلي الجامعة تختارني !

طريقة المذاكرة

بداية السنة ما كان في ضغط شديد والحياة كانت وردية لكن معظم المواد خصوصًا المواد العلمية كانوا بيتشافوا لي صعبات .. لحد الشهر التاني حتى قدرت احل مشكلتي معاهم وكان عن طريق الحل الكتير بس .. تصدّقوا ؟ الناس ال ما مقتنعة بحكاية الحل الكتير .. الكهربية والمولارية ف الكيم، المغناطيسية والتوافقية والكهربية ف الفيز ..

الدائرة والتفاضل والتكامل ف الرياضيات ..

حلّيت مشكلتهم عن طريق حل امتحانات كتيرة بس!

ما تستهينوا بالنقطة دي أبدًا وحلّوا كتير شديد، حلّوووووووووا كتير شديد ..

التحفيز الذاتي

درجاتي ف الامتحانات الشهرية كانت كويسة لكن انا زولة طمّاعة ما كانت مالية عيني، دايم بقول لنفسي :

لا لا انا بقدر اجيب اعلى من كدا ..

كنت بهتم بالامتحانات الشهرية والتجريبية وبحرص انو ما اغيب ابدًا ايام الامتحانات ودي نقطة مهمة عاوزاكم تركزوا فيها "خصوصًا اللي بيغيبوا ايام الامتحانات بحجة انهم عاوزين يقروا ف البيت" ..

انتوا محتاجين تمتحنوا وتغلطوا وتغلطوا وتغلطوا .. ما مهم تجيبوا كم ف الامتحان، المهم تحلوا وتغلطوا وتعرفوا غلطكم عشان تصححوه وتتفادوه بعدين، رجاءًا كونوا حريصين انو تمتحنوا اي امتحان .. الشيء دا بيفيدكم انتوا .

و ف نفس الوقت ما كنت بدي درجتي ف الامتحانات اهمية كبيرة .. اهم شي عندي كان اني امتحن واغلط، يعني بالمختصر الامتحانات كلها كنت بعتبرها تمرين بس احدد بيهو مستواي واعرف نقاط ضعفي وين عشان اقويها ونقاط قوتي وين عشان احافظ عليها ، ما كنت بخلي درجتي تحبطني لو ما كانت حلوة .. ولا كنت بتطمن واقول خلاص انا تمام لما تكون حلوة.

اسعوا واستمروا وما تفقدوا الامل مهما كانت درجاتكم ..




امتحانات الشهادة قربت ..

في الفترة دي كنت بحرص انو اقرا الفات قراية خفيفة ما تاخد زمن كتير " لانو انا already قارية من زمان وهسه دي تُعتبر مراجعة بس " .. ف اغلب اوقاتي كانت حل امتحانات ومراجعة الفات .

ولكن نفرض في حاجات كتيرة ما كنت قارياها من زمان واتزنقت ..

التوتر عند الطلاب

اول شي ما تتوتروا .. لو باقي للامتحانات اسبوعين الزمن لسه بيكفي ..

قولوا بسم الله وابدوا حبة حبة، شوفوا الحاجات ال ما مزبطنها شديد .. لو حاجة فهم ابحثوا عن شروحات ليها، اسألوا الاساتذة، شوفوا زمايلكم ال فاهمنها يشرحوها ليكم .

ولو حاجة حفظ زي سورة النور والقصايد ابدوا احفظوها ..

جهدكم مفروض يتضاعف اكتر .. لو بتقرا ساعة اقرا ساعتين ، لو بتقرا ساعتين اقرا ٤ ساعات ..

المهم اول شي حاولوا تنقذوا الحاجات ال ما واقعة ليكم وال ما زبطت معاكم من زمان ..

انقذتوا اموركم؟ يلا نبدا نقرا الفات قراية مراجعة خفيفة ..

استراتيجية للتفوق

اوعى ثم اوعى تقروا حاجة انتوا اصلاً قارينها كأنكم تقروها من اول مرة، ما تبدوا من الصفر ابدًا ! ..

حاجة بتعرفوها راجعوها مراجعة خفيفة .. زمنكم وجهدكم محسوبين عليكم ما تضيعوهم ف حاجات انتوا عارفنها !

ارشادات من الاوائل

وعاوزة احذركم كمان من الجري ورا الحصص والكورسات والمعسكرات وغيرهم .. سواءًا ايام المدرسة او قبل الامتحانات ، حاجة انتوا ما بتستفيدوا منها شديد ما تنضموا ليها .. زمنكم محسوب عليكم يخوانا، اعتمدوا على اساتذة مدرستكم وما تدخلوا معاهد وكورسات الا لو كنتوا جد جد محتاجين.

بدت امتحانات الشهادة .. ليه نتوتر وليه نخاف ؟

قرينا وساهرنا واجتهدنا وما قصرنا، ربنا حيضيّع تعبنا ؟ حاشاه كلا ..

العقل السليم في الجسم السليم

نوموا بدري عشان تمشوا للامتحان مصحصحين،

احرصوا تكونوا ماكلين كويس .. ما تمشوا وبطنكم فاضية، خلوا معنوياتكم فُل وما تعملوا للامتحان قومة وقعدة ..

فعلاً الحاجات البسيطة دي بتفرق، والعامل النفسي بيأثر شديد ف شغلك بعدين ف الامتحان .

واهم شيء ما تفتحوا اي كتاب قبل الامتحان بـ ساعة على الاقل، ال ما قريتوا طول السنة ما حيتقري ليك قبل الامتحان بـ ساعة .. غير انو الحاجة دي ما بتعمل شيء الا تزيد توترك وتطير ليك المعلومات الفاتت ، سو اتفقنا ؟ قبل الامتحان ما نراجع المادة.

في الختام عاوزة اقول ليكم انو عيشوا تالتة دي بـ كُل حماس وشغف وسعادة، ما تخلوها سنة كلها نكد وزهج وسلبية .. صدقوني دي سنة من احلى سنين حياتكم، اجتهدوا واتعبوا وعافروا وبرضو كونوا إيجابيين وسعيدين فيها .. موّفقين يا اوائل الشهادة💘💘.