قصص ملهمة : الطالبة المتفوقة مريم تحكي ضوابط تفوقها في الدراسة
أوائل الشهادة السودانية - سلسلة قصص ملهمة عن الطلاب والطالبات المتفوقين من مختلف المدارس مقدمة لتلاميذ الصف الثالث الثانوي مع طرق المذاكرة والنتيجة المحرزة
الجزء الثاني
الطالبة : مريم عاطف عبد الجليل عبد الجبارالمدرسة : المعالي الثانوية الخاصة بنات
النسبة : 95.7%
سنة الامتحان : 2022_2023
الولاية : الخرطوم
لعب،نوم، اللامبالاة وعدم قراية.
لاحظوا معاي دا كله من بداية السنة!! شي غريب صح؟يعني حتى الحماس الكان بجي لبرالمة الثانوي انا لا.
جات امتحانات الفترة الأولى و جبت نسبة ما حصل جبتها في حياتي و هي 89.4 %، ماغريبة لأنو كله ناتج عن الوضع الكان حاصل..
طيب حتقولو ليه متفاجئة؟ لأنو في احساس جواي بقول لا، دا ما مستواك.
طبعاً دا مابنفي التساؤلات المظلمة الاتولدت جواي:الحصل شنو يا ربي ؟ هل انا فشلت ؟ هل دي حتكون نسبتي في امتحان الشهادة ؟ هل في طريقة أصحح الأنا عملتو و أصلح موقفي ؟ و إذا قررت أبدا حأبدا من وين ؟ و لو بديت هل حألحق ؟ تساؤلات كتيرة بتجمعها صفة محاسبة الذات ،الندم و الإحساس بالعجز التام؛ خصوصاً إنه لقيت الكتير من التعليقات و الآراء السلبية على الدرجة دي وطّنت إحساس الفشل عندي من ضمنها إني مستهترة و إني ما حأنجح و إنو خلاص (it's done) ما تحاولي أساساً حتظلي كدة بالمستوى دة ،ما حتجيبي كويس في امتحان الشهادة ما حتدخلي طب الخرطوم و إلى آخره.
ثقتي في نفسي إهتزت وحسيت اني بلا قيمة وما يُستصحب من أحاسيس تانية والعزز الأحاسيس دي أكثر اني كنت بواجه خطر اكاديمي بما تحمل الكلمة من معنى لأني ماقارية شي ولا عارفة طريقة الامتحان كيف !
٨٩ ممكن تكون درجة كويسة نوعاً ما للعامة بس بالنسبة لي شيء كارثي! يعني بالنسبة لي توقعاتك شيء صادم جداً.
الكثير من المتراكم و صفر من الأشياء المنجزة عزيمة ماف و توقع مؤكد بفشل أي محاولة اقوم بيها.
بس...
(لكل جواد كبوة)
ربنا سبحانه وتعالى مابختك في طريق وإلا هو مناسب مع مقدراتك، ربنا رحيم مابكلف الزول فوق طاقته أبداً وأياً كانت الطريقة الإتخصلت بيها من اليأس انا بشوف إنها سبب من رب العالمين.كان من الممكن يتخذ أي هيئة تانية و السبب ده ما كان ربنا حيحرمني منه أبدا لأنو لا يخلف وعده و هو قال:( لئن شكرتم لأزيدنكم) .
و أنا كنت كل ما انصدم بدرجة كعبة على قدر ما ثقتي في نفسي بتهتز على قدر ما ثقتي في ربنا بتقوى اكتر؛ كنت بسجد و ببكي و بحمد ربنا كثيراً و على قدر ما كانت بتكون كعبة على قدر ما بزيد من الحمد بنفس راضية جداً و يصاحبه دعاء مُلِح و موقن بالإستجابة فلا يأس مع الله عشان كنت واثقة اني لمن اعمل كدة خاتمة المطاف بتبقى اكثر من مرضية، و غير كدة ربنا بيرضى عني دنيا و اخرة و يرضيني في درجتي كمان .
و من هنا تنشأ القوة من الضعف؛بالصحبة الإلهية. فخليكم قراب من ربنا جداً و ربنا طريقه سهل يعني و إياكم من اليأس و القنوط عشان أسيادنا إبراهيم و يعقوب قالوا إنه ما بيقنط من رحمة ربه إلاّ الضالين و انه ما بييأسوا هم من روح الله و هم كانوا بمروا بلحظات أسوأ من حقتنا؛ سيدنا إبراهيم فاقد الذرية و هو على كبر، سيدنا يعقوب فقد اتنين من اولادو الحبيبين و ربنا أبهرهم بالمعجزات و رغم إنهم أنبياء إلا أنهم أنكروها بداهةً في الأول من شدة الصدمة و شافوها م منطقية و تعجبوا لكن لمن استدركوا مين الواهب عرفوا منطقية الهبة.
صدقوني الطريق دة عاقبته سعيدة لأبعد حد خليكم واثقين من كدة و أحرصوا على تزكية الصفة دي فيكم دة اول شي.
يلا الاعتقادات البفتكر ربنا سخرها لي هي اني اول شي قعدت مع نفسي بكل واقعية و قلت بعيداً عن اي كلام خارجي انا أذا بديت اقرا و اجتهد و معاي ربنا بكل تأكيد حأصل ! ليه ما اشتغلت بكلام زول ؟ عشان لمن المصدر الأعظم للقوة و هو رب العالمين يأمر أمره هو حينفرض على المتكلمين ديل أولهم و حينفرض على الكون كله و حيمدني بالقوة منه.يلا بعد كدا بدأ الحماس والشغف يرجع بالتدريج وبديت أطلع من دوامة اليأس.
ماعارفين كيف تلحقو نفسكم؟
عايزين تعرفو الخطوات المناسبة عشان تطلعو من الأزمات الزي دي شنو؟
يلا تابعو معاي وحلل وكلامي كويس واستفيدو من تجربتي عسى ولعل تلقو حلول لمشاكلكم
يلا بسم الله توكلنا على الله
بديت أقيم مستواي الأكاديمي أول شي (نقطة مهمة شديد ياشباب لأنو لمن تعرفو مستواكم كويس حتقدرو تضعو المناسب معاكم )،طلعت ورقتين وحدة كتبت فيها الدروس المتراكمة بترتيب على حسب المواد و الثانية كتبت فيها أبواب المواد برضو حسب المواد نفسها.وهنا ظهر السؤال الاكثر تعقيداً من النظرية النسبية نفسها ياربي أواكب مع المدرسة في الدروس الحالية ولا اخلص المتراكمة اول ؟ السؤال الذي حيّر جميع العلماء، فلقيت إني ابدا حالاً مواكبة مع ناس المدرسة أفضل لأسباب كتيرة و لمن يتوفر وقت فراغ ابدا طوالي اطلع ورقتنا السمحة ديك و اشوف اقرا شنو من الدروس المتراكمة ( ترتيب قراية الدروس المتراكمة نفسها بعتمد على الموازنة بين المواد و درجة أهمية الدروس ).
عملت إضافة جديدة الا و هي إني أحل مذكرات و أشوف محتوى الكتاب كله و ما أتجاهل أي شي و بالذات التمارين؛ عشان بجيبوا منها بالحرف و أعمل على أي شي القاه غريب هايلايتر عشان الليلة و بكرة الامتحان الفحو عالسريع . حل المذكرات عشان بياخد زمن اخترت ليه واحد من الجمعة و السبت ( طبعا لغاية هسي بس واحد منهم عشان عندي دروس متراكمة فقسمت اجازة الاسبوع بينهم الاتنين الحل و المتراكم .. المذكرة دي بتطلع ليها ورقتنا دييك بتاعت الابواب و تحدد اكثر الابواب العندك فيها مشاكل .. تبدا بيهم اول و بعدين تواصل عادي .. الباب اول بتديه مراجعة و تثبيت بعدين تحلو ( مراجعة يعني تكون قاريه قبل كدة درس يوم بيوم يعني ما معلومة جديدة تماما فاهم ؟ لو معلومة جديدة دة حيكون تبع الدروس المتراكمة ي فهم تقراها اول و بعدين لمن تعمل باب تحلهم ).. و المذكرة عشان م تروح ف الهوا لازم تطلعوا زييتها يعني م تحلوا و تفكوها ساي تقلب محلل سياسي عديل و تفحص انا غلطت و وين و بسبب شنو و المشكلة دي علاجها عند انهي دكتور يعني لو انت دكتور نفسك لو الاستاذ دكتورك لو المهم اي شي .. المهم تعالج السيدة المشكلة دي .. و ثم ثانيا اي شي غريب او معلومة برة الكتاب او اي شي انصدمت و قلت ف نفسك وااااو هو كدة بجد تقوم دة تعمل عليه هايلايتر ،كمان ملخصات المدرسة تستفيد منها تعمل هايلايتر عالمعلومة البرة الكتاب .باختصار تشوف المصادر المتاحة ليك و تستخلص ما هو خارج الكتاب و تعمل عليه بالهايلايتر و تقراه.
تاني شي النسيان ؛المشكلة البعاني منها كل سمك المدارس. يلا ي سمكة، النسيان فطرة لكن أثرو مضر. هدفنا نقضي على أثر النسيان من تسقيط احجارنا في الامتحان و غيرو و ليس النسيان ذات نفسو .
طريقة القراية نفسها و عدد مراتها ؟ كل زول و طريقتو ممكن ورقة و قلم ،ممكن تقسم لنقاط اساسية و تربطها بجملة وحدة و تجي تاني تقسم الاساسي لفرعي و تتلاعب و تتفنن و كدة ، ممكن تكرر كتير و تجي تسمع شفوي و تحريري بورقة و قلم مرة او مرتين.
نقطة تالتة، القراية على فترات متباعدة مفيدة جداً يلا ممكن كإقتراح _ تنفيذو على حسب الفايض الزمني بتاعك _ لمن تجي تقرا درس اليوم تدي شرح او تسميعة خفيفة لحق امبارح كامراجعة و كدة .و اصلا لمن تجي تحل المذكرة لازم لازم تقرا الباب الانت اصلا قاريه قبل كدة؛ كدة حتكون قريته مرتين .ممكن برضو يكون عندك فترة صغيرونة كدة في الاسبوع بتراجع فيها القريتو في الاسبوع كلو ؛ زايد قراية الامتحان . كدة لو عملت دة كلو بتكون قريتو ٤ مرات تمام ؟
بعدين حتة الزمن مهمة جداً ؛الناس بعد تخلص مقررات تشوف امتحانات كاملة عشان المشكلة الحقيقية زمن الحل. تتدرب كتير لمن زيتك يطلع 😭 و تعرف زمن الحل بتاعك كم ؟ و تقلله بقدر الامكان.
زمن النوم كان مشكلة،عن نفسي كنت بنوم ١٠ ساعات دة اقل شي في اليوم دة نظامي كدة و لو قللتو بمرض عديل يعني ما رفاهية ولا كدة .ما بعرف اساهر ما بعرف اصحى بدري دة كلو م بينفع معاي انت شوف البخليك مرتاح و إعداداتك مظبوطة كم ساعة من النوم ؟ و هل ينفع تساهر او ينفع تصحى بدري ؟ عشان ما تقرا و انت نعسان او مجهد ،و مع ذلك لكل قاعدة شواذ
ممكن اقول إنو الامتحان دا بالنسبة لي. كان مقياس وظهر لي نقاط ضعفي عِلماً بإنو كنا قطعنا نص المقرر ..
بعد كدة جا تاني امتحان و جبت ٩٧ الحمد لله. غريبة إنو ربنا سريع الجزاء كدة رغم اننا ما بنعبده حق عبادته اصلا صح ؟ فزي ما قلت ليكم الحمد و الرضا و صحبة رب العالمين في كل تفصيلة من حياتك هم المخارج لأسوأ اللحظات البتمر بيكم . بعد الهباب حقي داك الناس انصدمت من الفرق الشاسع و انا كمان انصدمت و كنت بدعي ربنا يارب اجبرني جبر يتعجب له اهل السموات و الأرض و قد حدث الناس كانت منصدمة جداً،الحمدلله قدرت اتخلص من السلبية الجواي على الرغم من المقارنات والسلبيات البتواجهك في بيئتك بطبيعة الحال ماف وضع او حالة مثالية لازم نلاقي بعض العقبات و لو انتظرنا المثالية معناها ما حنتقدم أبدا في
 |
| قصص ملهمة : الطالبة المتفوقة مريم تحكي ضوابط تفوقها في الدراسة |