وظائف السودان : شرح ايجاد فرص عمل بالالحاح
وظائف - فرص عمل - عقودات
الدرس الأول : شرح اللحلحة وكيفية إيجاد الوظيفة المناسبة
كيف تبقى ملحلح وتلقى وظيفة وملائمة بسرعة؟؟
يا عزيزي الليلة حنتناول موضوع مهم جدًا...
هو إنك كيف تبحث عن وظيفة وشنو أساليب اللحلحة التتبعها😉
يلا يحلو انتت اول لحلحة مفترض تتبعها هي الإنترنت ده
ومواقع السوشيال ميديا...
بدل تقعد تكمل نتك في فلان طلق وليلي قالت
كملو في بناء نفسك حتى لو كنت شغال بالمجاني استغل المجاني لصالحك😉
١. لإيجاد وظيفة أولا حدد تخصصك
والحاجة الشغال عليها فتش القروبات والصفحات التابعة لتخصصك وابدا شيل منها المفيد وشارك في نقاشاتهم
بحت براك واسأل واعرف وزيد نفسك علم وشارك في اي شى ليه علاقة في مجالك وتخصصك
طيب حاستفيد شنو؟
لنأخد مثال انا رغده عندي مؤسسة بتاعت خدمات إلكترونية ومحتاجة لكاتب محتوى
حامشي واتابع صفحات كتاب المحتوى وفي كل بوست فيه نقاش او اسئلة بلقى كومنت لي(×) فيه كلام قيم ومفيد ويحسسك بإن الزول ده متمكن ...
تلقائيًا تركيزي حيتجه عليه إلا أن اقول ليه يا (×) عايزاك تكتب لي محتوى...
٢.استراتيجية الإلحاح الوظيفي في العقودات
حاشوف شغلو كيف؟ عجبني حاشغلو معاي طوالي✅ بالتالي :
- حتخلي أصحاب المؤسسات يركزو معاك!
- وفي نفس الوقت حتلقى الناس المهتمه بكتابة المحتوى حتتابع الزول ده وكده بقى حولينو في جمهور✅
الحاجة دي سوا كانت في فيسبوك او لينكدن او انستغرام ركز في المنصة البتستخدمها أنت أكتر...
متزكر ود خاله امك الشغال في نفس مجالك داك؟؟ يلا دي تاني لحلحة
يلا يا استاذ وصيه عليك ما تعمل فيها خجلان وهناي
عملو دراسة ولقو إنه أغلب الموظفين الجداد في الشركات بكونو توصية!
٣. ثالث لحلحة ما تقيف في نفس الحتة لإيجاد فرصة العمل
كيف يعني؟ يعني يا رهيب أنت تابع تطورات مجالك واتطور معاها ما تخلي شى يفوت عليك أي شى حيضيف ليك امشي في خطاه
او ممكن عادي تغير مجالك كامل وتمشي مع مشى السوق والبطلبه وتنمى مهاراتك في المطلوب
ووصلنا لآخر ورابع لحلحة استعين بالناس البتوفر وظائف(وده البنقدمو في رغده للخدمات الإلكترونية😌) في حال أنت بتتعب من التفتيش وما بتحب تجتهد كتير في الفتيش...
🛑ما في وسط اللحلحة
عرفت العايزو خلاص
شنو الخطوات العملية الحتوصلني؟
طيب يا شاب انت!
ماف حاجة بتتعمل بين يوم وليلة ولا حتبقى رهيب بين يوم وليلة..
لإيجاد وظيفة تذكر أن !
في رحلتنا دي حنشيل معانا الصبر كيمان، ومعاه دفتر واقلام(عشان تزين بيها دفترك ونفسك تكون فاتحة وانت بتتعلم)
لبحث فرصة عمل تذكر أنه :
انو بدون هدف واضح وخطة واضحة ما حتقدر تصل بسرعة ولا حتستمتع بالرحلة.
اول خطوة خت هدف لي نفسك ويا حبذا لو كانت أهداف صغيرة
مثلا خلال اسبوع حتحضر 7 فيديوهات للمجال المعنى بمعدل فيديو واحد في اليوم...
خلي دفترك صحبك واكتب فيه كل صغيرة وكبيرة لانو ما كل شى بقعد في الراس...
طبق اي شى بتتعلمه، وما تقيف علي الفيديو وبس خلال اليوم ابحث في حتات تانية وشوف الناس العابرة في المجال...
ما تبدا من الصفر ابدا من حتت وقف القبلك بمعني؟
استعين بالناس العندهم خبرة في المجال واسأل من تجاربهم ووريهم شغلك والخطوات الماشى عليها واطلب رائهم...
نهاية الاسبوع تعال وشوف نفسك انجزت شنو وكافئ نفسك ان شاء الله بكباية قهوة او لبانة او كلام حلو ليها😂
وما تيئس ابدًا شيل معاك الثقة في ربنا ونفسك وحتصل لي العايزو بإذن الله تعالى
في الكومنتات وريني شنو المجال الاخترتو؟ عشان اجيب ليكم محاضرات وحاجات بتخصه سواء كانت مجانية او مدفوعة بسعر بسيط
وما تنسى تعمل تاق لاصحابك وشير وفولو لمتابعة كل جديد
وريني في الكومنتات إذا حصل اتلحلحت واستخدمت وحده من أساليب اللحلحة؟ وشنو كانت النتيجة؟
وإذا لا منتظر شنووو عشان تتلحلح؟
#تقديمات
#وظائف
#نصائح_وظيفية
 |
| الدرس الأول : شرح اللحلحة وكيفية إيجاد الوظيفة المناسبة |