المتفوقون : عادات الدراسة الخاطئة التي يجب تجنبها

الطلاب الأوائل : العادات الخاطئة أثناء عند الدراسة أو المذاكرة

السلام عليكم ورحمة الله وبركاته
اخواننا في الدعم النفسي كيفكم ان شاءالله بخير
بوست المرة دي شوية مختلف

جمعنا استبيان لأكثر من 300 طالب متفوق تحت عنوان " لا تغلط غلطتي " وهكذا كانت إجاباتهم (تم حذف الاجابات المكررة) :-

1. كنت بخاف شديد جداً جداً والخوف ما خلاني اقدر أنجز ولا اقرا ولا اي شي
2. ما كنت بحل امتحانات قديمة
3. كنت بزحم نفسي بي مليون مادة ودا خلاني مشتتة وما قادرة اقرا
4. ما خليت حصة خاصة ما دخلت فيها او معهد او مراجعات المدرسة فضيعت زمني في حاجات اصلا عارفاها
5. كنت بساهر لحدي الشمس تشرق وبدخل الجلسة وم بكون متذكرة اي شي
6. كنت بتحمس اقرا في يوم باب كامل وخمسة ايام تاني اقرا ورقتين
7. كنت بقرا العاجبني وافرز الدروس على كيفي دا بجي ودا ما بجي في الامتحان ولقد خذلنا
8. ما كنت بقرا من الكتاب بالذات الفيزياء والكيمياء وكنت معتمدة على المذكرات
9. ما كنت بقرا كل المواد بنفس الريت مواد اديها 14 ساعة في الأسبوع ومواد 3 و 2 ومرات صفر
10. كنت بضغط روحي شديد( ما بقول ما تضغط نفسك لكن م للدرجة العبيطة دي )
11. كنت بحل الامتحانات اختبار لمعلوماتي بس مع انو مفروض اوزن بيها الزمن واتغلب بيها على حاجز الخوف
12. الاستهتار
كنت مستهتره بالمرحلة دي واقول اه تجي زي ما تجي ومقضياها لعب وتلفون وتأجيل وعرفت قيمة الحاجة دي لمن جات نتيجة القبول( خليكم من الشهادة ) ولقيت نفسي اتقبلت في مكان لا عايزاه لا رغبتي وحسيت بالعجز الشديد لاني ما بقدر اغير حاجة والزمن فات
13. كنت مهملة الانجليزي لأبعد درجة ممكنة مع انو اصلا ما عابرة فيه وما عارفة الثقة الجواي بانو بتجازف دي كنت جايباها بي وين وفي النهاية هو النزل نسبتي
14. كنت براجع قبل الامتحان طوالي وبكون براجع لحدي الجرس يضرب ولحدي ما اصل باب القاعة بكوم براجع وكل الكلام البكون بقرا فيهو دا بطير وبطير معاه الكنت قارياه برضو
15. كنت خاتة على اساس الاسبوعين القبل الامتحان طوالي لحل المريحات وطبعا الزمن ما اسعفني وما قدرت اتمها غير انو الحاجات الما كنت بعرفها ما كان عندي ليها حل لانو المدرسة أجزت
عشان كدا المريحات اول بأول زي القراية
16. التوتر القبل الامتحان طوالي
والله والله والله الموضوع ابسط مما تتخيلو زي زي ال 10 سنين الفاتو من حياتكم
17. كنت كسولة شديد في موضوع القراية دا وما بقرا بي حماس ولا بكون عندي نفِس اقرا وكنت بحس نفسي زي المجبورة ... مجبورة اجيب درجة وخلاص ودا خلاني اهرب من القراية واتحجج بي صحية بدري وحاجات كتيرة فارغة ما عندها علاقة عشان كدة خلو دافعكم للقراية قوي
18. بديت قراية جدجد قبل شهر واحد من الامتحان وقريت رسومات الأحياء لأول مرة في حياتي قبل امتحان القرآن بيومين
19. في امتحان الكيمياء استهترت بالامتحان عديل وكنت قاعدة بحل بيد واليد التانية خاتاها في وشي وبعاين للسؤال بطرف عيني عشان كدة لمن لحقت اراجع لقيت نص الورقة غلط ( باختصار شديد اوعك تفكر انك مجضم المادة وتستهتر بيها سواء في القراية ولا الامتحان )
20. ما كنت عاملة جدول وبقرا بالبركة ساي وبي مزاجي وبضيع زمن كتير شديد بعدم الجدول
21. كنت بقارن جهدي وتعبي ودرجاتي مع باقي الناس وديل خاشين مليون درس لازم ابقى زيهم
22. غلطتي الأكبر اني ما كنتا بقرا كنتا مقضية يومي في التلفون أو في التلفزيون بالجد ما كنتا مدية زمن للقراية شوية شوية لمن الامتحان بقا يقرب بقا الضغط يزيد علي لاني ما كنتا مستعدة ليهو بقيت مكتئبة ما عرفتا ابدا من وين اقرا شنو و اخلي شنو فبقيت اكسر حنك القراية لاني ما كان عندي نفس و قنعتا خلاص بالجد فقدتا الأمل في إني اعوض شغل شهور في أسابيع و ايام معدودة
23. في مواد انا عارفة نفسي كويسه فيهم عشان كدا م عندي ليهم كراسات ولمن جا اول امتحان ندمته انو م كاتبه أفكاري للمراجعه فتبته وجبته كراسات
24. كنته قايله انو يومك كلو لازم يكون قرايه دا غلط ولازم يستريح المخ فالغلط الكنته بسويهو بقعد قدام الكتاب وبساهر للصبح وحصل واغمى على قبل كدا وكنته البذاكرو بنساه فبقيت اخد بريكات ووقت معين للقرايه واللعب
25.ما تأجل درس الليلة لبكرة لو ح تموت عشان التراكمي سلوك خاطئ.
26. كنت بستحي اسأل من الحاجة الماعارفاها ودا خلاني قريب الامتحان في حاجات كتيرة ماعارفاها وماف وقت اصلا اسأل منها بعد دا ولكم ان تتخيلو الضغط النفسي بسبب الحاجة دي
27. جبت مطبوعات وامتحانات كتيييره و م اشتغلتها
يعني كنت بحاول اجمع اكبر عدد من المطبوعات والامتحانات عشان احلهم واقرا منهم
28.كنت ايام بزهج من القراية و نفسيتي و اقعة واطه فعشان كدا لازم دايم تكون بوزتف انرجي لمن تتعب نفسيا